Dikhljaripe e nevipengo ko 12 00h

Tetradji, 8. avgusti 2012.

BEOGRAD – Ministri edukuibasko thaj scienciako Žarko Obradović vakargja kaj nane problemia ani realizacia projekteski bipokinibaske pustika, adjahar kaj ano septembri ini štarti generacia fundone skolake sikljovnengi ka len bipokinibaske školake pustika. Bipokinibaske kompletia pustikenge ini akale beršeste, ani sa Srbia, ka len sikljovne e anglune dži štarte klaseske. Prekal projekti Ministribasko edukuibasko thaj scienciako dikhljardo sakoja avutni beršeski skolaki generacia te lol kompleti bipokinibaske školake pustikengi.

BEOGRAD – Pres servisi prezidentesko Srbiako ikalgja lačhardno mothovdipe kotar vakeribe Tomilsav Nikolićesko e šefea UNMIK Farid Zarif ano savo precizno mothavelape kaj šefi UNMIK/esko "ašungja iniciativa"prezidenteski KN aktivno te oven ano vakeribe Beogradesko thaj Prištinako. Ano angluno mothovdipe kotar Prezidiumi angle vakardo kaj Zarif "denga dumo kotar bahami prezidentesko Nikolić kaj KN aktivno manglape te oven ano toki e vakeribasko". Sar vakardo ano mothovdipe, Zarif vakargja kaj sito vaš tehnipe thaj arakhibe ani sa teritoria Kosovo thaj Metohia, vakeriba kaj na ka oven tolerišime varesave jekhrigake akcie. Ov vakrgja kaj ano vakeribe pozitivno dendili nota kotar rola UNMIK ano Kosovo thaj Metohia thaj vakardo kaj lundjaripe e dijalogesko Beogradi thaj Priština manglape te vazdolpe ano pobaro niveli, sar ini te barjarenpe arakhibe thaj siguripe. Nikolić lepargja kaj khonik na ka anavol biphanglo Kosovo thaj Metohia, vakeriba kaj sig ka ikljol e planea, kotar savo adžukarelape konsezus sa relevantno politikake thaj aver faktorengo.

BEOGRAD – Ani Srbia e 1. oktobaresta ka oven pobare akcize thaj dini pedo panda molipe, pedo molipe e dizutnengo, vakargja turvinutno vaš dinesko sistemi ano srbikano ministribe finansiengo Milica Bisić. Ano intervju vaš majnevo gendo NIN savo ikljola, oj vakargja kaj vazdipe odova dini manglino sebepi te tiknjarolpe baro budžetesko deficiti, numa ini vakargja kaj ka dikholpe barjaripe te ovol so pohari. Prekal lafja Bisić, PDV majčače ka ovol barjardo e 18 pedo 20 šelestar, ini kaj tikno badžako šaj te ačhol ohto šelestar.

BEOGRAD – Ministri agroekonomiako Srbia Goran Knežević vakargja kaj ano pharipe sebepi so na denga brišind ulavde habaske produktja musaj te oven pokuč. "Ka dikha te kera intervencia e ulavde produktenge, ka dikha e subvencienca agroeknomiake dženge te arakha ini olenge produktja ta na oven kuč,te dikha ta na barjara but molipe", vakargja Knežević vaš B92. Ministri agroekonomiako vakargja kaj škodra ka dikholpe e nekobor šelutne milionia evrenca.

BEOGRAD – Teloprezidetno Thagarutnako Srbia Aleksandar Vučić vakargja kaj rezultatia e neva thagarutnake ano maribe opipe korupcia ka oven dikhle nadur thaj vakargja kaj ka pučolpe bireslini privatizacia. "Nane buti thagarutnaki te vakarol kaj ka phanol, dizutne ka dikhen kaj institucie kerena piri buti. Klidutno pučipe vaš amen sito ko lela thaj sar te inara themutne love. Ano odova dikhipe raštrake institucie ka len sa mangline napja ano nadur vaktesko roki", vakargja Vučić vaš RTS. Prekal oleske lafja, dizutne ka dikhen kaj raštra siola šajipe ano mribe opipe korupcia thaj kriminali.

BEOGRAD – Direktori thagarutnaka Kancelariako vaš Kosovo thaj Metohia Aleksandr Vulin denga protesti sebepi so kosovake thagarutne nadur astarde lil pi srbikani čhib "Jedinstvo" ano Kosovo. Sar vakardo ano mothovdipe kotar thagarutnaki Kancelaria vaš Kosovo thaj Metohia, Vulin ano lila UNMIK/eske thaj Kforeske vakargja kaj savore savenge srbikani čhib sitoj dajaki čhib ano Kosovo thaj Metohia adjahar adikariba ačhavdi šansa vaš tromalo informišibe. Vulin vakargja kaj adjahar "procesi e kosovake thagrutnengo siton diferentno e anavde maškarthemutne standardenca kotar tromali stampa thaj hakaj pedo informišibe thaj nisar našti te kerenpe čhinadipe savenca šaj te ovol šajipe o khupatne te arakhen, te uluvuinen thaj te barjaren poro identiteti".

NIKOZIJA – Ministari avrune bukengo Kiparesko Erato Kozaku Markulis vakrga, palo vakeribe e šefea diplomatiako Srbia Ivan Mrkić ani Nikozia, kaj gndinela kaj Srbia ka ovol ola vakribe kotar dženutnipe ani Evropaki unia dži agor e beršesko. Kozaku Markulis vakargja kaj lejiba anglopašipaske vakeribe prezentuinena "zumavipasko, numa baro" reso dži Srbia pherela kriteriumia vaš dženutnipe ani Unia, ulavde kana ano pučipe relacie e Kosova, legarela agencia AP. Mrkić palo vakeribe e kipareske kolega vakargja kaj Srbia khonik na ka ačhol e deviba dumo vaš biphanglo teritorialno integriteti Kiparesko, legarela kipareski žurnalistikani agencia CNA.

Beta

Aver artiklia: